..شوية تواضع
...........
السادة المؤمنون بالأديان الإبراهيمية : قليل من التواضع يا سادة
نصف سكان الكرة الأرضية تقريباً لا يهتمون كثيراً بل ربما لا يعرفون من الأساس ما هى مقدساتنا
..
نتصور أن كل ما يجرى فى الكرة الأرضية هو مؤامرة ضخمة ضدنا
حد يقولى بأمارة إيه ؟ متقدمين مثلاً ؟ لينا أى إسهام - غير فى التاريخ - لتقدم البشرية لا قدر الله ؟
..
يا سادة إحنا حالنا يصعب ع الكافـر
إحنا على هامش الحياة
و أول خطوة لو عايزين نغير ده إننا نعرف وضعنا الحقيقى
..
خمسة آلاف سنة
و نحن فى السرداب
ذقوننا طويلة
نقودنا مجهولة
عيوننا مرافئ الذباب
:يا أصدقائى
جربوا أن تكسروا الأبواب
أن تغسلوا أفكاركم
و تغسلوا الأثواب
:يا أصدقائى
جربوا أن تقرأوا كتاب
أن تكتبوا كتاب
أن تزرعوا الحروف
و الرمان
و الأعناب
أن تبحروا إلى بلاد الثلج و الضباب
فالناس يجهلونكم
فى خارج السرداب
الناس يحسبونكم
نوعاً من الذئاب
..
جلودنا ميتة الإحساس
أرواحنا تشكو من الإفلاس
أيامنا تدور بين الزار
و الشطرنج
و النعاس
هل (نحن خير أمة أخرجت للناس)؟
نزار قبانى
...
ده علشان( أفش خلقى ) على رأى أخواننا اللبنانيين ، ربما أكتب لاحقاً و لو إن باين إننا بندن فى مالطة
posted by wa7ed mn masr @ 10:30 PM
7 comments
7 Comments:
ياعنى انت شايف ان الاحباط وجلد الذات و التنصل من هويتنا الاسلامية والعربية والارتماء فى حضن الاخر هو السبيل ? ده اللى انا فهمته من مقالك و يمكن انت قصدك حاجة تانية? على فكرة موضوع المؤامرة ده حقيقى لو عنك وقت شوف ملفات الفيديو دى على video.google.com تحت عنوان the power of night mare وانت بتتفرج اضغط على more from this user
http://video.google.com/videoplay?docid=461187809452836609&q=the+power+of+nightmare
بتدن في مالطة؟ يا ريت
شوفت يا عم وجود أشخاص على الانترنت تتشابه أرائهم صار مؤامرة
أقرأ التعليقات عندي و أنت تشوف ناس بتدعي أن كل من لا يدين بالاسلام عارف أن الاسلام هو الحق بس بيستهبل و أن المسيحيين المصريين عايزين يحولوا قيدهم لمكتب التنسيق بس أمن الدولة يا حرام مانعهم
ده غير اللي يقولك المفروض القانون الدنماركي يمنع الاستهزاء بمقدسات الديانات السماوية بس يسمح بالتلويش في مقدسات الديانات الغير السماوية الكخة.
ده غير السيد الروائي المثقف جمال الغيطاني اللي ميعرفش الفرق ما بين فرنسا و الدنمارك و اللي بيقولك النرويج الفناء الخلفي للسي أي ايه (على أساس أن مصر مبولة السي أي ايه كل الحكاية و دي مفيهاش حاجة).
و بعدين كلنا يا عيني محروقين نتكلم عن الهولوكوست و الغرب الكخة حايشنا عشان الغرب ده راجل بوشين و وحش
و شرف النبي زي عود الكبريت و الغرب لازم تنزل و التار ولا العار
والله بتدن في مالطة فعلا... بس وحياة الرسوم الموسيئة كلامك مظبوط
الأخ اللى مش كاتب أسمه : الحقيقة مش عارف إنت مش فاهم فعلاً و أنا كاتب ألغاز ، ولا سطر الإتهامات اللى إنت عامله سؤال ده ليه قصد تانى ، هافترض حسن النية : لأ يا سيدى مش قصدى كدة،لابد من إعادة تقييم مواقفنا و عقلنا الجمعى و طريقة تفكيرناو إعادة صياغة لفهمنا للحياة و الآخر كخطوة أولى للخروج من حالتنا الحالية و إلا سنبقى أسرى لحالة غير مبررة من الشعور بالتفوق الوهمى و الإضطهاد الدائم
يا ريت تكون فهمت
علاء : أنا بقالى يومين بتكلم مع ناس بيقولوا كلام من ده ، المصيبة إنهم مصدقين الكلام ده و لسة واحد متخلف فى فضائية وسخة بيقولك لازم يعملوا تشريعات تمنع الإساءة للأديان و بعدين زعلان إن الدنيا قامت لما طالبان دمروا تماثيل بوذا و بيقولك الدنيا قامت علشان شوية حجارة ، ماحدش قاله إن فيه نص مليار بيقدسوا شوية الحجارة
أحمد : نورت البلوج
المسلمين لو عايزين يعرفوا اعداء الاسلام الحقيقيين يبصوا في المرايه,طول ما فيه 50 برنامج ديني شغلهم الشاغل الحجاب احسن ولا النقاب,الست تحكم ولا ما تحكمش ال يعني الرجالة بسلامتهم عارفين يوصلوا للحكم اصلا يبقى حانفضل كده ملطشة الامم و ماحدش بقى يفتح بقه. لما نحترم نفسنا و عقولنا تبقى الناس تحترمنا.
فى الحقيقة أنا معجبة جداً بآراء علاء وواحد من مصر. أنا كمان واحدة من مصر وزهقت من الإحساس بالتفوق الوهمى اللى احنا عايشينه فى حين إن الدول اللى بجد وعندها رؤساء بجد سبقتنا بملايين السنين الضوئيةولا أمل فى اللحاق بهم إلا إذا افقنا كلنا من الغباء والبلاهة والإعلام الحكومى اللى حيجيب داغنا بريادته الإعلامية وسمعنا وفهمنا الدنيا ماشية إزاى. أصل الكلام اللى احنا بنفضل نقوله ونسمعه داخل العالم العربى خارج سياق الأحداث بل وخارج سياق المنطق أيضاً. إذا كان ذلك بخصوص فتاوى الحجاب أو تحريم التماثيل أو حرمانية المعايدة على الأقباط. كفاية تخلف بقى وتعالوا نشوف بلدنا دى حتقوم لها قومة ازاى فى وجود شلة السيد الرئيس ونجله.
وللكلام بقية فى وقت ومكان آخر
بعد السلام
أنا افهم النقاش الدائر بين من يعتقد في نظرية المؤامرة وبين من يعتقد أن كل السبب في اللي بيحصل في عالمنا العربي والاسلامي بسببنا ..... اللي مش فاهمه ومطير النوم من عينيا ويا ريت حد يدخلووو في مخي الزنك ليه كل البنات اللي سبقوني بالرد جايبين قضية الحجاب وبإستهزاء هل لهذا علاقة بأنهم يمكن بقول يمكن غير محجبات ومتعقدين من القضية دي ..... ما علينا
رأيي ان الاخ كاتب المدونة اصاب جزء من الحقيقة , فتغيير اوضاعنا بإيدنا احنا وبس حثى لو كان فيه مؤامرة على رائي اللي خالفوه وما فيش اي تناقض بين انه فيه مؤامرة خارجية وبين ان مصيرنا احنا اللي بنقرره والعلم هو طريقنا
بشوية تفصيل وعلى رأي الاستاذ محمد هيكل ويا ريت كل الشباب تتابع حلقاته لانه استاذ بحق سواء اختلفنا معاه او اتفقنا , المهم على رائيه ان التاريخ ما هواش مؤامرة بالكامل ولا هو ماشي بالصدفة كدة , بمعنى ان الدول تسيرها مصالح وليس اهواء ورغبات دي طبعاً الدول اللي هي دول مش قصدي اشباه الدول اللي انتو عارفينها طبعاً
Post a Comment
<< Home