...لا مارد و لا عصفور

البحر بيضحك ليه
و انا نازلة اتدلع أملى القلل
.......
البحر غضبان مابيضحكش
أصل الحكاية ماتضحكش
البحر جرحه مابيدبلش
و جرحنا و لا عمره دبل
........
البحر بيضحك ليه
و انا نازلة اتدلع أملى القلل
.........
مساكين بنضحك م البلوى
زى الديوك و الروح حلوة
سرقاها م السكين حموة
و لسه جوه القلب أمل
.........
البحر بيضحك ليه
و انا نازلة اتدلع أملى القلل
..........
قللنا فخارها قناوى
بتقول حكاوى و غناوى
يا قلة الذل أنا ناوى
ما أشرب و لو فى المية عسل
............
البحر بيضحك ليه
و انا نازلة اتدلع أملى القلل
..............
ياما ملينا و ملينا
لغيرنا و عطشنا سقينا
صابرين و بحر ما يروينا
شايلين بدل العلة علل
...........
البحر بيضحك ليه
و انا نازلة اتدلع أملى القلل
........
فى بالى ياما وعلى بالى
و اللى بيعشق ما يبالى
مايهمنيش من عُـزالى
يا حلوة لو مرسالى وصل
...........
البحر بيضحك ليه
و انا نازلة اتدلع أملى القلل
............
بينى و بينك سور ورا سور
و أنا لا مارد و لا عصفور
فى أيدى عود رنان و جسور
و صبحت أنا فى العشق مثل
...........
البحر بيضحك ليه
و انا نازلة اتدلع أملى القلل
.........

نجيب سرور

إستمع بصوت الشيخ إمام